فيه علاقات كتيره في الدنيا صعبه بس لو بذلت فيها شويه مجهود زياده هتنجح وبيحصل العلاقه طرديه ما بينهم ، بس للأسف فيه علاقات كدا مستحيل تنجح زي العلاقه بين كمال الأجسام ( الابطال بتوعنا ) وبين الفلانتين ، اليوم دا بيحتاج مجهود كبير من الراجل بالذات أنه يهتم ويفكر في الهدايا اللي بتحبها ويحاول يفأجها من أنها عارفه مسبقا انه كدا كدا هيجبلها هديه ، أصل يعني مش هيقدر يستحمل كميه النكد اللي هيشوفها لو نسي مثلا ومجابش هديه أو كان مشغول شويه ، فبيريح دماغه وبيبدأ يفكر قبلها يجبلها ايه وميكونش مكرر وهديه تعجبها ومتبوظش اليوم دا !!
وأكيد أنت كبطل كمال أجسام حتي لو بتحبها جدا هتكره اليوم دا جدا وهتتمني أن اليوم دا يتمحي من السنه ، ويوم 14/2 هيبقي بالنسبه ليك أكتر يوم بتكرهه في حياتك كلها لو مرتبط وحتي بردو لو سنجل ، أصلك لو مرتبط هتتضطر تقضي اليوم كله معاها وممكن تعمل حاجات كتيره تبوظ الفورمه ، ولو سنجل هتحس قد اي انت وحيد ووقتك كله رايح بس علي الفورمه وهتكتئب بردو ، بس احنا في المقاله دي هنحاول نديك يا بطل شويه نصايح تعملهم لحبيتك في اليوم وتحاول تخلي العلاقه العكسيه بين كمال الاجسام والحب تبقي طرديه حتي ولو بـ 1% بطرق بسيطه وسهله ومتاخدش من وقت تمرينك كتير .
ابعتها لرساله :
البنات عامه بتحب الكلام ، وبتحب تقرأ أكتر ما تسمع ، فانت خليها تستقبل اليوم دا برساله غراميه منك بتتغزل فيها وفي كل صفاتها الجميله ، وحاول بقدر الامكان انه يكون كلام عام ومش مترتب علشان هما بيحبوا الكلام يكون من القلب ، والرساله دي مش هتاخد من وقتك اكتر من 5 دقادئق وتبعتها ليها ، والرساله دي هتكون أهم حاجه انت عملتها في اليوم وعمرها مهتنساها وممكن تبطل تنكد عليك لفتره طويله قدام .
ابعت ليها ورود :
علشان متسمعش كلمه " انا عاوزه ورد يا ابراهيم " في اليوم يبقي لازم تبعت ليها ورد حلو وشيك علي عنوان بيتها او شغلها ، ودا مش هياخد من وقتك اكتر من 5 دقادئق بردو ، مجرد فقط هتتصل بمحل الورود وتتطلب منه الورد وتبعته علي بيتها وبكدا ضمنت انها تقعد اليوم كله متكلمكاش ومتضيعش وقت التمرين عليك ، ومتسمعش التمرين عندك أهم مني ؟ .
اعزمها علي العشاء :
بعد ما تخلص التمارين وتنهي يومك ، اتصل بيها وفاجئها انها لازم تنزل دلوقتي علشان محضر ليها مفاجاه وهتقابلها في مكان هي بتحبه ، وحضر مسبقا هديه هي بتحبها ، وقولها انك طلبت تقابلها دلوقتي مش علشان وقت انتهاء تمارينك ، ولكن علشان دا أفضل وقت رومانسي ممكن تنبسطوا فيه وتنهوا بيه يوم الفلانتين وانتوا مع بعض .
حاول بقدر الامكان تتبع النصايح السابقه وتطبقها معاها لو عندك تمارين مهمه في اليوم ومش هتعرف تقضيه معاها طول اليوم ، وبكدا هتحافظ عليها وهتحبك أكتر ، ولو أنت سنجل فانت محتاج في تمارينك أكتر علشان نشوفك قريب في بطوله دوليه .