لو دورنا دايما هنلاقي علاقة قوية بين التغذية السليمة وعلاقتها بشكل الجسم والصحة بشكل عام ، سواء كنت عايز تخس أو تزود الكتلة العضلية فإنت محتاج تغذية بشكل سليم و صحي لإنها هي اللي هتفرق في شكل جسمك و صحتك مع ممارسة التمارين بشكل مستمر.
عملية إنقاص الوزن بتعتمد علي التغذية بنسبة 70% و ممارسة التمارين بنسبة 30% بمعني إن كل ما هتاكل أكل صحي و تتمرن فرصتك في إنقاص وزنك أو زيادته و تغيير شكل جسمك هتكون كبيرة و هتلاقي نتيجة مرضية ليك في وقت مش كبير و المجهود اللي بتبذله في التغذية السليمة ميقلش أهمية عن التمرين والجهد البدني اللي بتعمله خلال ممارسة أي نوع من أنواع الرياضة.
يبقي سواء عايزين نخس أو نزود الكتلة العضلية لازم عنصر التغذية يكون بيكمل عنصر التمرين ، لإن مينفعش أي عنصر منهم يشتغل لوحده و يحققلك النتيجة اللي بتتمناها لازم يكون في تكامل بين العنصرين مع بعض.
إيه اللي بيحصل للجسم لو بدأنا نتمرن من غير نظام غذائي؟
لو إتكلمنا عن تمرين من غير نظام غذائي اللي هيحصل إن الجسم في التمرين هيحرق اللي بيدخله بس ، مش هييجي جمب الدهون المتخزنة نهائي و ده لإنك مش بتخليه يعمل الفرق بين السعرا الحرارية و المجهود البدني اللي يخليه يحاول يحرق الدهون المتخزنة و يعوض منها نقص السعرات.
حتي في حالة إنك جربت تعمل دايت وتخسس جسمك من غير تمارين ، جسمك وزنه هيخس بس و النسبة الأكبر من الوزن هتكون كتلة عضلية و مياة و الدهون اللي هتنزل هتكون نسبتها قليلة جدا ، ده يخلينا نعرف إن كتلة الدهون هتنزل من الجسم بنسبه بسيطه والشكل و المقاس هيقلوا بنسبه بسيطه ده غير إنك هتدخل في مشاكل تانيه علشان تحلها هتاخد وقت و مجهود و فلوس زي الترهلات ، علامات تمدد الجلد ،السيلوليت و شكل الجسم هتكون مش راضي عنه.
في حالة لو بطلت تمرين خالص إيه اللي هيحصل ؟
-أولا لو بطلت تمرين و انت مش ملتزم بنظام غذائي ، اللي هيحصل إنك هترجع تزود الدهون في جسمك ووزنك هيزيد ونسبة الدهون هتكون أكبر من الكتلة العضلية و في حالة إن كتلة العضل عندك كبيرة فنسبة الدهون اللي هتكتسبها هتكون قليلة بالمقارنة بالعضل في جسمك يعني العضل هو اللي هيتحكم في نسبة الدهون لو كانت كتلتة كبيره و قوية علي عكس لو كانت ضعيفة هتكون فرصة إكتساب الدهون أكبر ووزنك هيزيد.
في حالة إنك تتوقف عن التمرين بس إلتزمت بنظام أكل صحي فنسبة إنك تتخن و تكتسب دهون هتكون قليلة ، و هيكون التأثير الأكبر علي نسبة العضل.
و أخيرا إحنا لو بطلنا تمرين من غير نظام غذائي هنخسر نسبة عضل وفي المقابل هنكتسب نسبة دهون والكتلة العضلية مع الوقت حجمها هيفضل يقل كل ما الدهون بتزيد ، يبقي في حالة إننا هنبطل ممارسة رياضة علي الأقل نحافظ علي نظامنا الغذائي و الأكل الصحي.