ناس كتير دايما بيحبوا النتائج السريعة و الغير مرهقة من غير ما يفكروا في إيه اللي ممكن يحصل علي المدي الطويل ، ده بالظبط اللي بيعمله بعض الرياضين و لاعبي كمال الأجسام لإن حلمهم هو تضخيم عضلاتهم و الحصول علي جسم مثالي فبيحقووا تضخيم و بناء عضلاتهم بسرعة بإنهم ياخدوا مكملات غذائية و منشطات من غير ما يكونوا عارفين نتيجة و تأثير الحاجات دي علي جسمهم و صحتهم في المستقبل.
دراسات كتير أثبتت إن المكملات و المنشطات ليهم تأثير سلبي علي الصحة و الجسم علي المدي الطويل ، المنشطات بتحتوي علي هرمون التوستيرون و هو بيساعد علي نمو العضلات و زيادة حجمها و لكن كل الحاجت دي هي فوائد مؤقتة و بتسبب أضرار أكتر من الفوائد اللي بشكل كبير.
كل حاجة في الدنيا لازم نلاقي ليها بديل و المكملات الغذائية ليها بدائل طبيعية كتيرة و متوفرة عند كل الناس و ملهاش أضرار علي الصحة و الجسم لإنها طبيعية و أكيد إن تأثيرها مش هيكون بسرعة المكملات الغذائية و لكنها أكتر فائدة و أضمن للصحة و الجسم علي المدي الطويل.
أفضل أطعمة طبيعية غنية بالبروتينات و الفيتامينات:
منتجات الألبان
-اللبن مليان فوائد كتيرة جدا زي البروتين والكالسيوم اللي بيساعدوا في الحفاظ علي العظام و بناء العضلات و إفراز مادة السيراتونين و اللي بدورها بتساعد الشخص إنه يحصل علي نوم هادئ و دايما بينصح بشرب كباية لبن دافية قبل النوم للمساعدة علي الإسترخاء و مساعدة الجسم علي الراحة علشان يقدر يبذل طاقة أكبر و يكون عندة نشاط و صحة كويسة.
الفواكة
-التين المجفف من الفواكه اللي بتحتوي علي كمية كبيرة من الألياف و المعادن والبوتاسيوم و مصدر رئيسي للطاقة والسكريات اللي بتساعد الرياضيينعلي عدم الشعور بالتعب والإرهاق وهو فاكهه خفيفة علي المعدة و الجهاز الهضمي.
الموز ليه فوائد كتير و دايما بينصح الرياضيين بأكلة قبل التمرين و بعده لإنه غني بالبوتاسيوم اللي بيحافظ علي الجسم و العضلات من حصول أي شد عضلي نتيجة المجهود الزائد.
الخضروات
-الألياف والمواد المضادة للأكسدة بيساعدوا في عملية إصلاح الخلايا التالفة و تحمل الجسم للمجهود العضلي اللي بيحصل أثناء التمرين و المساعدة علي إمتصاص الأكل بشكل سليم بسبب وجود الألياف ، كل ده نقدر نلاقية في السبانخ و البروكلي ده غير إنها غنية بالكالسيوم وممكن نستغني عن منتجات الألبان في وجود خضروات زي دي.
المكسرات
غنية بالسيلينيوم اللي بيحمي القلب بسبب المجهود الزيادة و كمان بتقلل من الكوليسترول في الدم و الدهون الضارة ، في أنواع كتير من المكسرات زي اللوز و عين الجمل والكاجو و ممكن أكلها بين الوجبات للرياضين.
الأسماك
-الأسماك زي السلمون والتونه غنية بالأوميجا 3 اللي بيفيد عضلات القلب و بيحافظ علي صحتة، و بيحتوي علي البروتين اللي بيساعد في نمو العضلات و تقوية العظام.