كل سنة العالم بيحتفل باليوم العالمي للنوم يوم 16 مارس ، وطبعا الفيس بوك بيتملي كومكس عن التريند دا ، وبتلاقي ناس بالفعل بتتفاعل مع اليوم دا وبتقضيه كله نوم ، وبالنسبه ليك أنت كرياضي أكيد سألت طيب هو النوم لية فايدة ليا ، طيب النوم ممكن يأثر علي العضلات مثلا اللي أنا تعبان فيها ، فأحنا قررنا نحتفل معاك باليوم دا ونعرفك هما ليه من الأساس عملوا يوم عالمي للنوم وإية فايدتة ليك كرياضي ومدي تأثير النوم بشكل عام علي عضلاتك يا بطل .
سبب وجود يوم عالمي للنوم : من 2008 م ، أجتمعت الرابطة العالمية للنوم تحت إسم ( WASM ) وقرروا ان يوم 16 مارس يكون يوم عالمي للنوم ، علشان يفكروا الناس بمدي أهمية النوم الجيد والصحي لجسمهم ، الي جانب يأكدوا عليهم علي مدي ضرر قلة النوم علي الجسم وعلي صحتهم بشكل عام وتركيزهم وحياتهم الأجتماعية .
وطبعا محدش يقدر ينكر أن النوم له فايدة كبيره جدا علينا ، وأنة السبب الرئيسي اللي مخلينا مكملين في الدنيا بتركيز وصحة جيدة ، طيب بالنسبه ليك أنت " كرياضي " هل لية فايدة ؟ :
بالتأكيد لة فايدة كبيره وأحنا نصحناك قبل كدا أنك لازم تنام نص ساعة بعد كل تمرين بتعمله علشان عضلات جسمك ترتاح ومتتعبش تاني يوم في حركتك ، الي جانب أن النص ساعة نوم بعد التمرين دي هتساعد عضلات جسمك أنها تتعافي بسرعة جدا وهتاثر بشكل عام علي مختلف العمليات الحيوية في جسمك واللي ليها علاقة مباشرة بالعضلات والبروتين ، وهنقدر نوضحلك دا في نقاط رئيسيه وهما :
1_ النوم وإنتاج هرمون التستوستيرون : كلنا عارفين أهمية هرمون التستوستيرون في بناء العضلات وخاصة عضلات البطن وتقويتها ، فأثتبت جميع الدراسات أنك لو نمت أقل من 8 ساعات في الليل لمدة أسبوع هرمون التستوستيرون هيقل عندك جدا وبالتالي هيحصل ضعف بشكل عام في الجسم ودا هيقلل من نمو العضلات حتي لو بتأدي كل تمارينك بشكل سليم .
2_ النوم وإنتاج هرمون النمو : هرمون النمو له أهمية كبيره لكل الرياضين بأنه بيحافظ علي الشباب والقوه ، وخصوصا أن إفرازه عندك بيقل بشكل طبيعي في منتصف العمر ، لذلك لازم تنام من 8 ساعات يوميا لأكثر في الليل علشان الهرمون يتفرز عندك بشكل قوي ، وبيعتبر هرمون النمو مركب بروتيني معقد بيتفرز عن طريق الغدة النخامية . وبيزيد أنتاجه لما بتمارس التمارين الرياضية لكنة بيكتر وقت نومك .
وطبعا زي ما قرأت أن النوم لة فضل كبير في إنتاج هرمونين مهمين لجسمك ، علشان كدا لازم تنام يوميا مش أقل من 8 ساعات أثناء فتره الليل ، وبعد ما تخلص تمرينك نام " نص ساعه " وهتصحي تاني يوم بدون ما تحس بأي وجع في عضلاتك وهتقدر تمارس يومك بشكل طبيعي وترجع من تاني لتمارينك يا بطل ، لذلك Champions حابه تقولك كل سنة وأنت نايم بشكل كويس ، وكل سنة وأنت مؤدي تمارينك ومحافظ علي صحتك .